Çin Prezidenti Si Cinpin tezliklə Şimali Koreyaya səfər edə bilər.
Yeniavaz.com xəbər verir ki, bu barədə “Yonhap” xəbər agentliyi Cənubi Koreya hökumətindəki mənbələrə istinadla məlumat verib.
Agentliyin mənbələrindən biri məlumatın Si Cinpinin tezliklə Şimali Koreyaya səfər edəcəyini göstərən kəşfiyyat məlumatlarına əsaslandığını bildirib.
Mənbənin məlumatına görə, Çin lideri Pxenyan və Vaşinqton arasındakı münasibətlərdə vasitəçilik etməyə cəhd edə bilər.
Digər tərəfdən mənbə agentliyə bildirib ki, Cənubi Koreya Prezidenti Li Çje Myun yanvar ayında Pekinə səfəri zamanı Si Cinpindən iki Koreya dövləti arasında münasibətlərdə vasitəçilik etməsini xahiş edib və Çin Prezidenti bu xahişə müsbət cavab verib.
Bundan əlavə, Si Cinpinin KXDR-ə səfərinin yüksək ehtimalının sübutu Çin xarici işlər naziri Vanq Yinin Şimali Koreyaya son səfəri və Çin təhlükəsizlik rəsmilərinin və Çin prezidentinin protokol xidmətinin Pxenyana səfərləridir.
Başqa bir mənbənin sözlərinə görə isə bu səfər may ayının sonu və ya iyun ayının əvvəlində baş tuta bilər.
Tətbiqimizi yükləyə bilərsiniz
