“2020-ci ildən bəri 400-dən çox şəxs mina qurbanı olub”

2020-ci ildən bəri — sülh dövründə 400-dən çox mülki şəxs mina partlayışları nəticəsində həlak olub və ya ağır yaralanıb.
Yeniavaz.com xəbər verir ki, bu barədə Prezidentin köməkçisi Hikmət Hacıyevin 4 Aprel – Beynəlxalq Mina Təhlükəsi Haqqında Maarifləndirmə Günü ilə bağlı “X” hesabında dərc etdiyi məlumatda qeyd olunub.
“Dünya irəlilədiyi halda, Azərbaycan hər gün səssiz və görünməz bir təhlükə altında yaşamağa davam edir.
Azərbaycanın ərazisinin təxminən 12 faizi 30 illik işğal dövründə Ermənistan tərəfindən yerləşdirilmiş 1,5 milyondan çox mina ilə çirkləndirilib.
2020-ci ildən bəri — sülh dövründə 400-dən çox mülki şəxs həlak olub və ya ağır yaralanıb.
Mina çirklənməsi Qarabağ və Şərqi Zəngəzur bölgələrində yenidənqurma və bərpa işlərinə, həmçinin keçmiş məcburi köçkünlərin öz yurdlarına təhlükəsiz və ləyaqətlə qayıdışına mane olur.
Bunlar sadəcə rəqəmlər deyil. Bunlar yarımçıq qalan həyatların, dağılmış ailələrin və oğurlanmış gələcəklərin hekayəsidir. Minatəmizləmə yalnız texniki proses deyil, bu, ədalət, insanların öz evlərinə təhlükəsiz qayıtmaq kimi fundamental hüququnun təmin olunması məsələsidir”, - Hikmət Hacıyev qeyd edib.