Qazaxıstanın sabiq prezidenti Nursultan Nazarbayev Qazaxıstanda yeni konstitusiya layihəsi üzrə keçirilən referendumda səs verib.
Yeniavaz.com xəbər verir ki, o, paytaxtdakı Astana Opera binasında yerləşən seçki məntəqəsinə gələrək səsvermədə iştirak edib.
Birinci prezident seçki məntəqəsinə gəldikdən sonra jurnalistlərlə danışmayıb, lakin media nümayəndələrinə əl yelləyib. Jurnalistlər əsasən ondan konstitusiya islahatı ilə bağlı mövqeyini şərh etməsini istəsələr də, Nazarbayev bu barədə açıqlama verməyib.
O, bülletenini alaraq səsvermə kabinəsində doldurub və bülleten qutusuna atdıqdan sonra məntəqəni tərk edib.
Qazaxıstanın hazırkı konstitusiyası 1995-ci ildə, Nazarbayevin prezidentliyi dövründə qəbul olunub. Ölkənin hazırkı prezidenti Kasım‑Jomart Tokayev isə dəfələrlə ilk prezidentin fəaliyyətini və həmin dövrdə qəbul edilmiş konstitusiyanın dövlətin inkişafındakı rolunu yüksək qiymətləndirib.
Yeni konstitusiya layihəsində dövlət idarəçiliyi sistemində bir sıra siyasi yeniliklər nəzərdə tutulur. Bunlara vitse-prezident vəzifəsinin yenidən təsis edilməsi daxildir. Bu vəzifə ölkədə 1991–1996-cı illərdə mövcud olub, lakin daha sonra ləğv edilib. Bundan başqa, ölkədə birpalatalı parlament sisteminə keçid və digər institusional dəyişikliklər də təklif olunur.
Vətəndaşlar referendumda yeni konstitusiyanı dəstəkləyəcəyi təqdirdə, sənədin 1 iyul tarixindən qüvvəyə minməsi planlaşdırılır.
Qeyd edək ki, Nazarbayev 1991–2019-cu illərdə müstəqil Qazaxıstan Respublikasının prezidenti olub.
Tətbiqimizi yükləyə bilərsiniz
