Rusiya ilə İran arasında strateji hərbi əməkdaşlığı gücləndirən yeni sənəd imzalanıb.
Yeniavaz.com “Reuters”ə istinadən xəbər verir ki, razılaşmaya əsasən, Tehran Moskvadan ümumi dəyəri 589 milyon dollar olan gizli silah paketini əldə edəcək.
Müqavilə Rusiyanın dövlətə məxsus müdafiə ixracatçısı “Rosoboronexport” ilə İran Müdafiə Nazirliyi arasında bağlanıb. Sənədə görə, İran 500 ədəd ən son “Verba” mobil zenit-raket sistemi və 2500 ədəd “9M336” raketi alacaq.
Yeni sistemlər üç kanallı optik hədəfləmə texnologiyası ilə təchiz olunub. Bu xüsusiyyət onları xüsusilə aşağı hündürlükdə uçan obyektlərə, pilotsuz uçuş aparatlarına və qanadlı raketlərə qarşı effektiv edir. Silahların 2027–2029-cu illər ərzində üç mərhələdə İrana çatdırılması planlaşdırılır.
Rəsmi Tehranın açıqlamasına görə, bu qərar ötən ilin iyun ayında ABŞ və İsrail tərəfindən İranın üç əsas nüvə obyektinə həyata keçirilən raket hücumlarından sonra verilib. İran tərəfi bildirir ki, həmin hücumlar nəticəsində dəyən zərər artıq aradan qaldırılıb və yeni Rusiya hava müdafiə sistemləri gələcəkdə oxşar təhdidlərə qarşı daha güclü müdafiə təmin edəcək.
Analitiklər qeyd edirlər ki, bu gizli razılaşma Moskva ilə Tehran arasında artan strateji tərəfdaşlığın davamıdır. Rəsmi ikitərəfli müdafiə müqaviləsi olmasa da, ekspertlər Rusiyanın İranın hərbi potensialını gücləndirməsini Qərbin, xüsusilə ABŞ-nin təzyiqlərinə qarşı koordinasiyalı addım kimi qiymətləndirirlər.
Murad Məmmədov
Tətbiqimizi yükləyə bilərsiniz
