ABŞ bu ölkəyə hərbçi göndərdi

Terrorizmə qarşı mübarizədə iştirak etmək üçün təxminən 100 amerikalı hərbçi Nigeriyaya gedib.
Yeniavaz.com xəbər verir ki, bu barədə “Vanguard” qəzeti məlumat yayıb.
Məlumata görə, ABŞ hərbçiləri hərbi nəqliyyat təyyarəsi ilə Nigeriyanın şimal-şərqindəki Borno əyalətinin paytaxtı Mayduquriyə aparılıb.
Təxminən 200 hərbi məsləhətçi, analitik və təlimatçının Nigeriya Silahlı Qüvvələrinə antiterror əməliyyatlarının aparılmasında kömək etməsi gözlənilir.
Daha əvvəl ABŞ-nin üç hərbi nəqliyyat təyyarəsi Borno ştatındakı Nigeriya Silahlı Qüvvələrinin bazasına sursat da daxil olmaqla bir dəstə avadanlıq çatdırmışdı.
Qəzetin məlumatına görə, bu, oxşar uçuşlar seriyasından yalnız birincisidir.
Qəzet Nigeriya Silahlı Qüvvələrinin Baş Qərargahındakı mənbəyə istinadla yazır ki, Nigeriya və ABŞ arasında danışıqlardan sonra Amerika hökuməti Nigeriyaya təkcə hərbi personal göndərməyəcək, həm də terrorçularla mübarizə aparmaq üçün sursat təchizatı da daxil olmaqla lazımi logistika dəstəyi verəcək.
Ekspertlər qeyd edirlər ki, ABŞ qonşu Nigerdə ​​belə bir bazanı itirdikdən sonra Sahel bölgəsindəki vəziyyətə nəzarət etmək üçün Nigeriyanın şimal-şərqində hərbi kəşfiyyat dronları üçün baza yaratmağı planlaşdırır.
2025-ci ilin dekabr ayından bəri Nigeriya və ABŞ silahlı qüvvələri Nigeriyadakı ekstremist hədəflərə qarşı bir neçə birgə hücum həyata keçirərək, Afrika ölkəsinin dörd ştatında - Sokoto, Zamfara, Niger və Katsinada planlaşdırılan terror hücumlarının qarşısını alıblar.
Nigeriya Xarici İşlər Nazirliyinin mətbuat katibi Kimyebi Ebienfa bildirib ki, Nigeriya və ABŞ kəşfiyyat məlumatlarının mübadiləsi və digər əməkdaşlıq formalarında strateji cəhətdən fəaldırlar.
Hazırda əsas diqqət Qərbi Afrikada Boko Haram və İslam Dövləti qrupunun bir qolu olan ISWAP ilə mübarizəyə yönəlir.
Boko Haram terrorçuları 2009-cu ildə Nigeriyada, daha sonra isə Niger, Çad və Kamerunda fəaliyyətə başlayıblar. 2015-ci ildə Nigeriya Silahlı Qüvvələri qruplaşmanı böyük məğlubiyyətə uğradəb və nəzarəti altındakı ərazini əhəmiyyətli dərəcədə azaldıb.
2024-cü ildə Nigeriya terror hücumlarına görə dünyada altıncı yeri tutub.