Tuxel İngiltərə millisi ilə müqaviləsini uzatdı

Alman mütəxəssis Tomas Tuxel İngiltərə milli komandası ilə müqaviləsini uzadıb.
Yeniavaz.com xəbər verir ki, bu barədə İngiltərə milli komandasının mətbuat xidməti “X” sosial media platformasında məlumat yayıb.
Müqaviləyə görə, Tuxel 2028-ci il Avropa çempionatının sonuna qədər İngiltərə milli komandasına rəhbərlik edəcək.
“Biz öz yolumuza sadiqik. Tomas Tuxel yeni müqavilə imzaladıqdan sonra 2028-ci ilə qədər komandamıza rəhbərlik edəcək”, - mətbuat xidməti bildirib.
Qeyd edək ki, Tuxelin hazırkı müqaviləsi 2026-cı il Dünya Çempionatının sonuna qədərdir.
Xatırladaq ki, 52 yaşlı Tomas Tuxel İngiltərə milli komandasına 1 yanvar 2025-ci ildə rəhbərlik etməyə başlayıb. Komanda 2026-cı il Dünya Çempionatının seçmə qrupunda bir qol belə buraxmadan birinci yeri tutub. Alman mütəxəssis əvvəllər ”Çelsi”, “Borussiya Dortmund” və “Pari Sen Jermen” də daxil olmaqla bir neçə aparıcı kluba rəhbərlik edib.