Starmer gələn həftə istefa verə bilər – “Bloomberg”

Böyük Britaniyanın Baş naziri Kir Starmer bir həftə ərzində istefa verə bilər.
Yeniavaz.com xəbər verir ki, bu barədə “Bloomberg” agentliyi hakim Leyboristlər Partiyasındakı mənbələrə istinadla məlumat yayıb.
Məlumata görə, bu cür müzakirələrə səbəb amerikalı maliyyəçi Ceffri Epşteynin dostu Peter Mandelsonun Britaniyanın ABŞ-dəki səfiri təyin edilməsi ilə bağlı qalmaqal olub.
Bu qalmaqal artıq 8 fevralda istefa verən Britaniya Baş nazirinin aparat rəhbəri Morqan MakSuininin istefasına səbəb olub.
“Bloomberg”in məlumatına görə, hakim Leyboristlər Partiyasının bir neçə millət vəkili Mandelsonun səfir təyinatına icazə verməsinə baxmayaraq, Starmerin hələ də vəzifədə qalmasına təəccüblənir.
Agentlik bildirib ki, “Dauninq Strit – 10” ünvanında yerləşən bəzi kanselyariya əməkdaşları hökumət üzvlərinə gizli şəkildə zəng edir və baş naziri istefa verməyə məcbur etmək üçün inandırmağa çalışırlar.
Nazirlərdən birinin müşavirinin sözlərinə görə, Starmerin növbəti həftə vəzifədə qalma şansı 50 faizdir.
Agentlik vurğulayıb ki, Starmer vəzifəsini qorumaq üçün keçmiş müavini Angela Raynerə hökumətə qayıtmağı təklif edə bilər. Rayner ötən sentyabr ayında İngiltərənin cənubundakı bir mənzilə ödənilməmiş möhür rüsumu ilə bağlı qalmaqal səbəbindən istefa verib. O, həmçinin hazırkı Enerji Təhlükəsizliyi və Karbon Neytrallığı naziri Ed Milibandı daha nüfuzlu bir nazirliyə rəhbər təyin edə və bununla da ambisiyalarını yerinə yetirə bilər.
Starmer istefa verərsə, həm Rayner, həm də Miliband baş nazir vəzifəsinə real namizədlər olacaqlar. Britaniya mediasına görə, digər namizədlər arasında səhiyyə naziri Ues Stritinq, daxili işlər naziri Şabana Mahmud, xarici işlər naziri İvet Kuper, müdafiə naziri Con Hili və onun müavini Alister Karns da var.
Starmerin mümkün istefası avtomatik olaraq yeni ümumi seçkilərə səbəb olmayacaq. Bunun əvəzinə, Leyboristlər hökumətə rəhbərlik edəcək yeni partiya liderini seçmək üçün partiya səsverməsi keçirə bilərlər.