Benzema “Əl-Hilal”a keçdi

“Əl-İttihad” klubunun fransalı hücumçusu Kərim Benzema “Əl-Hilal” futbol klubu ilə müqavilə imzalayıb.
Yeniavaz.com xəbər verir ki, bu barədə klubun mətbuat xidməti məlumat yayıb.
38 yaşlı futbolçu ilə müqavilənin müddəti açıqlanmayıb.
Qeyd edək ki, Benzema 2023-cü ildən bəri “Əl-İttihad”da oynayır. O, klubla 2025-ci ildə Səudiyyə Ərəbistanı çempionluğunu qazanıb.
Yanvarın 29-da “L'Equipe” qəzeti Benzemanın “Əl-İttihad”da oynamaqdan imtina etdiyini, çünki klubun ona daha az maaşla müqavilə təklif etdiyini bildirib.
Benzema əvvəllər “Real Madrid” və “Lion” klublarında oynayıb. Hücumçu Madrid klubu ilə dörd La Liqa, üç Kral Kuboku və beş Çempionlar Liqası titulunu qazanıb.
2022-ci ildə Benzema Fransanın “France Football” jurnalı tərəfindən dünyanın ən yaxşı futbolçusuna verilən “Qızıl top” mükafatını qazanıb.
O, “Real Madrid”də 648 oyun keçirib, 354 qol vurub və klubun ikinci ən çox qol vuran oyunçusu olub.
Benzema 2007-ci ildən 2022-ci ilə qədər Fransa millisində oynayıb, 97 oyunda meydana çıxıb və 37 qol vurub. Hücumçu 2021-ci ildə milli komanda ilə Millətlər Liqasının qalibi olub. 2022-ci il Dünya Çempionatında isə Benzema Fransa millisi ilə gümüş medal qazanıb.