Tramp Davosa gedəcək

ABŞ Prezidenti Donald Tramp Davosda keçiriləcək Dünya İqtisadi Forumunda (WEF) iştirak etməyi planlaşdırır.
Yeniavaz.com xəbər verir ki, o, bunu işgüzar səfərdə olduğu Miçiqan ştatının Detroyt şəhərinin İqtisadi Klubunda çıxışı zamanı bildirib.
Digər tərəfdən, Dünya İqtisadi Forumunun prezidenti Berge Brendenin daha əvvəl “Reuters” agentliyinə verdiyi məlumata görə, Davos 2026-cı ildə ABŞ-nin ən böyük nümayəndə heyətini gözləyir.
Agentliyin məlumatına görə, Trampı forumda dövlət katibi Marko Rubio, Xəzinədarlıq, Ticarət və Enerji nazirləri, Prezidentin xüsusi nümayəndəsi Stiven Uitkoff, eləcə də, Amerika liderinin kürəkəni Cared Kuşnerin müşayiət edəcəyi gözlənilir.
ABŞ Konqresindən də böyük ikipartiyalı nümayəndə heyətinin Davosda olması istisna deyil.
Qeyd edək ki, 2026-cı ildə forum 19-23 yanvar tarixlərində “Dialoq Ruhu” mövzusunda keçiriləcək.
Xatırladaq ki, Dünya İqtisadi Forumu İsveçrənin qeyri-hökumət təşkilatıdır. O, biznes liderlərini, siyasi liderləri və müxtəlif sahələrdəki mütəxəssisləri bir araya gətirən illik görüşlər keçirir. Dünya İqtisadi Forumunun təxminən min böyük şirkət və təşkilatdan ibarət üzvü var.