Azərbaycanda dövlət, ictimai mənzil fondunun və mənzil tikinti kooperativləri fondunun (özəlləşdirilmiş fond istisna olmaqla) abadlıq şəraiti pisləşib. Yeniavaz.com Dövlət Statistika Komitəsindən açılan məlumatlara istinadən bildirir ki, 2001-2018-ci illər ərzində su kəməri ilə təmin olunan mənzil sahəsinin ümumi mənzil sahəsindəki payı 93,1%-dən 87,3%-ə düşüb. Bu o deməkdir ki, 2001-ci ildə dövlət, ictimai mənzil fonduna və mənzil tikinti kooperativləri fonduna daxil olan mənzillərin 93,1%-i su kəməri ilə təmin olunduğu halda 2018-ci ildə bu göstərici 87,3%-ə enib. Açıqlanan son məlumatladan belə görünür ki, mənzillərin 12,7%-də su kəməri mövcud deyil.
Onu da qeyd edək ki, dövlət, ictimai mənzil fonduna və mənzil tikinti kooperativləri fonduna daxil olan mənzil sahələrinin 15,1%-də kanalizasiya xətti (2001-ci ildə 8,9%), 35,4%-də mərkəzi istilik sistemi (2001-ci ildə 22,6%), 14,1%-də qaz (2001-ci ildə 4,7%), 94,8%-də isti su (2001-ci ildə 76,1%), 28%-də hamam (2001-ci ildə 22%) yoxdur.