Xəstəxananın 10-cu mərtəbəsində ac-susuz saxlanılan tibb işçiləri barədə TƏBİB-dən AÇIQLAMA

Sosial şəbəkələrdə Azərbaycandakı xəstəxanalardan birində tibb işçilərinin ac-susuz karantində saxlanılmasını əks etdirən görüntülər yayılıb.
Yeniavaz.com xəbər verir ki, görüntülərdə 7, 8 və 13 nömrəli uşaq poliklinikalarının tibb işçiləri olduğu iddia edilən şəxslərdən biri 10-cu mərtəbəsində olduğunu bildirdiyi xəstəxananın səlahiyyətli həkimlərindən biri ilə danışır və vəziyyəti ona izah edir. Bildirilir ki, onlar həmin yerdə ac-susuz və səhiyyə xidməti göstərilmədən, heç bir məlumat verilmədən saxlanılırlar.
Həmin kadrları təqdim edirik:
Məsələ ilə bağlı TƏBİB-lə əlaqə saxladıq. Qurumun mətbuat katibi Rəvanə Əliyeva bildirdi ki, sözügedən kadrlar Azərbaycan Tibb Universitetinin Tədris-Terapevtik Klinikasında lentə alınıb:
“İstənilən şəraitdə ölkə pandemiya vəziyyətinə əvvəldən hazır olmur. Xəstəxanalar hissə-hissə hazırlanır və karantinə yerləşdirilənlər hissə-hissə hər şeylə təmin olunurlar. İlk bir neçə saatda insanlar hər şeylə təmin olunmayıbsa, bu o demək deyil ki, ac saxlanılırlar. O məsələ aydınlaşdırılıb. Videodakı xanımlarla danışılıb. Onların özləri də deyiblər ki, göstərdikləri ilkin reaksiyadır və heç bir problem yoxdur. Sözügedən xəstəxana ilə əlaqə saxlanılıb və hər şeylə təmin olunublar”.