AzTV Cavanşir Quliyevə qadağa qoyub?


Əməkdar incəsənət xadimi, bəstəkar Cavanşir Quliyev dövlət televiziyası olan AzTV barədə ittihamla çıxış edib. 

Yeniavaz.com xəbər verir ki, tanınmış bəstəkar BBC azərbaycanca-ya müsahibəsində sözügedən kanalda hazırlanan bir tamaşanın musiqisi ilə bağlı sifariş aldığını, ancaq sonradan rəhbərliyin sifarişin ona verilməsini bildikdə buna mane olduğunu söyləyib. 

O, qeyd edib ki, bu tamaşada xaricdə yaşayan azərbaycanlı aktyorlar da çəkiləcək:

“Məndən də musiqini yazmağımı istədilər. Hətta başladım da işləməyə. Bir müddətdən sonra tamaşanın rejissoru bildirdi ki, AzTV-nin yeni sədri Rövşən müəllim “bu tamaşanın musiqisini Cavanşir yazmayacaq”, deyir”.

AzTV-nin mətbuat xidmətindən BBC azərbaycancaya bildirilib ki, bəstəkarın bu ittihamının haradan qaynaqlandığı onlar üçün də müəmmalıdır.

Qurumun sosial media və ictimaiyyətlə əlaqələr şöbəsinin rəhbəri Mübariz Aslanovun sözlərinə görə, AzTV-nin “Azərbaycantelefilm” Yaradıcılıq Birliyində hazırda çəkilişləri aparılan film və tamaşaların heç birində bəstəkar olaraq Cavanşir Quliyevə heç bir rəsmi müraciət olmayıb və yaxud bundan rəsmi imtina edilməyib.

“Ümumiyyətlə əvvəldən təsdiqlənən hər hansı bir yaradıcı heyətin siyahılarının heç birində Cavanşir Quliyevin adı olmayıb. Bu baxımdan bəstəkarın bu ittihamının haradan qaynaqlandığı bizim üçün də müəmmalıdır və bu, araşdırılacaq", Mübariz Aslanov qeyd edib.

Sözçü onu da vurğulayıb ki, AzTV heç bir zaman hansısa sənətçinin və ya mədəniyyət xadiminin əsərlərinə qadağa qoymayıb: “İstər AzTV, istərsə də Mədəniyyət kanallarında onlarla tanınmış sənətçilərin, xalq və əməkdar artistləri, bəstəkarların əsərləri yer alır və bu zaman Cavanşir Quliyevin də repertuarına yer verilir. Yeni tamaşalara gəlincə, istər aktyor, istərsə də musiqi tərtibatını bilavasitə peşəkarlara, bu sahədə öz sözünü deyən mütəxəssislərə etibar etmişik”.

Bildirişlərdən çıxın

Bildirişlərdən çıxın

DİGƏR XƏBƏRLƏR

Top