“Nestle” 16 min iş yerini ixtisar edəcək

İsveçrənin aparıcı “Nestle” şirkəti xərcləri azaltmaq üçün qarşıdakı iki il ərzində 16 min iş yerini (şirkətin əməkdaşlarının ümumi sayının 5,7 faizini) ixtisar etməyi planlaşdırır.
Yeniavaz.com xəbər verir ki, bu barədə şirkətin baş direktoru Filip Navratil mətbuata bəyanatında bildirib.
2027-ci ilə qədər şirkət müxtəlif regionlar üzrə 12 min müştəri xidməti mütəxəssisini işdən çıxaracaq ki, bu da Navratilin sözlərinə görə, hər il təxminən 1 milyard frank (1,2 milyard dollar) qənaət etməyə imkan verəcək.
İstehsal və təchizat zəncirinin səmərəliliyini artırmaq üçün əlavə 4000 nəfər də işdən çıxarılacaq.
Qeyd edək ki, “Nestle” İsveçrənin aparıcı qida korporasiyasıdır. 1866-cı ildə əsası qoyulan “Nestle”nin baş ofisi Veveydə (Vod kantonu) yerləşir. Korporasiyanın markalarına “KitKat”, “Maggi”, “Nesquik” və “Nestea” daxildir.