“ABŞ Alyaskaya əlavə qüvvələr göndərir” – “Politico”

“ABŞ hakimiyyəti Alyaskaya əlavə qüvvələr göndərir, çünki onlar Rusiya və Çinin regionda fəallaşdığını düşünürlər”.
Yeniavaz.com xəbər verir ki, bu barədə “Politico” məlumat yayıb.
“ABŞ ordusu Alyaska yaxınlığında mövcudluğunu tədricən artırır, bir esmines və uzaqmənzilli raket sistemi ilə təchiz edilmiş ordu birliyi göndərir, eyni zamanda Rusiya və Çinin artan hərbi fəaliyyəti səbəbindən Alyaska sahillərində gərginlik yüksəlir”, - məlumatda deyilir.
“Son bir ay ərzində Rusiya Hərbi Dəniz Qüvvələrinin bölgədəki fəaliyyətinə cavab olaraq, “Sterett” esminesi Alyaska sahillərinə yerləşdirilib, ABŞ ordusunun bir hissəsi Alyaskanın ucqar adalarından birinə enib və orada yerləşən qırıcı eskadrilya yüksək döyüş hazırlıq vəziyyətinə gətirilib”, - nəşr vurğulayır.
Qeyd edilir ki, Amerika tərəfi bu addımları Rusiya və Çin qüvvələrinin hərəkətlərinə cavab olaraq atıb.
Nəşr Alyaskadan respublikaçı senator Den Sallivandan sitat gətirir. O hesab edir ki, Rusiya və Çin regionda daha tez-tez manevrlər keçirməyə başlayıb. Nəşr qeyd edir ki, senator ABŞ hakimiyyətini Alyaskada hərbi infrastrukturu inkişaf etdirməyə çağırıb.
Qeyd edək ki, Şimali Amerika Aerokosmik Müdafiə Komandanlığı sentyabrın 13-də Alyaska yaxınlığında Rusiyanın iki hərbi təyyarəsini izlədiyini bildirib. Onların beynəlxalq hava məkanında qaldıqları və nə ABŞ, nə də Kanadanın hava məkanına daxil olmadığı qeyd edilir.