İsrail kəşfiyyat xidmətləri şiə Hizbullah milislərinin planlarını üzə çıxaracağından və hazırlanan gizli əməliyyatı pozacağından ehtiyat edərək onların peycerlərini və digər rabitə vasitələrini partlatmaq üçün əməliyyat keçirib.
Yeniavaz.com xəbər verir ki, bu barədə “Axios” portalı üç amerikalı məmura istinadən məlumat yayıb.
Portalın xəbərinə görə, əməliyyatdan xəbəri olan keçmiş İsrail rəsmisi iddia edib ki, ölkənin kəşfiyyat xidmətləri ümummilli müharibədə qəfil ilk zərbəni endirmək üçün Hizbullah üzvlərinin istifadə edə biləcəkləri “hiyləgər” peycerləri əvvəlcədən onların əldə etməsini təmin ediblər.
“Lakin son günlərdə israillilər şiə milislərinin peycerləri aşkarlaya biləcəyindən narahat idilər. Buna görə də kəşfiyyat xidməti Hizbullah tərəfindən aşkarlanmadan peycerləri partlatmaq qərarına gəlib”, - portal yazır.
İddiaya görə, Livanda peycerlərin partladılması əməliyyatı Yəhudi Dövlətinin Baş naziri Benyamin Netanyahu ilə hökumət üzvləri və təhlükəsizlik rəsmiləri arasında keçirilən görüşlərdə təsdiqlənib.
İki ABŞ rəsmisi “Axios”a bildiriblər ki, İsrail ABŞ-yə belə bir əməliyyata hazırlıq barədə məlumat verməyib. İsrail rəsmiləri portala bildiriblər ki, onların ölkəsi insident nəticəsində gərginliyin ciddi şəkildə artması riskindən xəbərdardır və hərbçilər şiə milislərinin mümkün cavabı üçün yüksək hazırlıq vəziyyətindədirlər.
Tətbiqimizi yükləyə bilərsiniz
