Bu ilin avqust ayının əvvəlindən ötən 25 gün ərzində avro Azərbaycan manatı qarşısında 3,3% bahalanıb.
Yeniavaz.com Mərkəzi Bankdan verilən məlumatlara istinadən bildirir ki, bu ilin avqust ayının 1-də 1 avronun məzənnəsi 1,84 manat olduğu halda, bu gün 1,90 manata yüksəlib.
Qeyd edək ki, avronun manat qarşısında qısa müddətdə bu qədər bahalanmasının səbəbi, dolların avro qarşısında dəyərdən düşməsidir.
Bildiyimiz kimi, Azərbaycanda manatın digər ölkələrin milli valyutaları qarşısındakı məzənnəsi dollara görə müəyyən olunur. Əgər hər hansı bir ölkənin milli valyutası dollar qarşısında dəyərdən düşürsə, həmin valyuta manat qarşısında da ucuzlaşmış olur. Əksi olduqda, yəni hər hansı bir ölkənin milli valyutası dollar qarşısında bahalandığı zaman, həmin valyuta manat qarşısında da bahalanır.
Avronun məzənnəsi son bir ay ərzində dollar qarşısında davamlı olaraq artır. Bu ayın əvvəlində 1 avro 1,07 dollara bərabər olduğu halda, bu gün 1,12 dollara yüksəlib.
Onu da bildirək ki, avronun manat qarşısında bahalaşması Avropa Birliyi ölkələrindən idxal olunan məhsulların qiymətinə təsir edə bilər. Məsələn, bu ayın əvvəlində Avropada dəyəri 100 avro olan məhsul üçün 184 manat ödəyirdiksə, hazırda eyni məhsul üçün 190 manat ödəyirik.
Xatırladaq ki, bu ilin ilk 7 ayının nəticəsinə görə Azərbaycanın ümumi idxalının 14,3%-i və yaxud 2,6 milyard manatı Avropa Birliyi ölkələrinin payına düşür.
Elnur Əli
Tətbiqimizi yükləyə bilərsiniz
