Gürcüstan parlamentinin eks-prezident Mixail Saakaşvilinin təsis etdiyi müxalif “Vahid Milli Hərəkat” partiyasından olan deputatları siyasi birliyin konstitusiyaya zidd olduğu elan edildikdən sonra deputat mandatlarından məhrum ediləcəklər.
Yeniavaz.com xəbər verir ki, bu barədə jurnalistlərə ölkənin Baş naziri İrakli Kobaxidze məlumat verib.
“Bizim konstitusiyaya görə, mandatları yalnız Konstitusiya Məhkəməsi ləğv edə bilər. Hesab edirəm ki, mandatların ləğvi partiyaya qoyulan qadağanın məntiqi davamı olardı”, - Kobaxidze bildirib.
Gürcüstanın Baş naziri həmçinin əlavə edib ki, Saakaşvilinin partiyasını konstitusiyaya zidd kimi tanımaq ölkədə siyasətin yaxşılaşdırılması üçün zəruridir.
Qeyd edək ki, avqustun 20-də Gürcüstanın hakim partiyası bəyanat yayıb ki, qarşıdan gələn parlament seçkilərində qalib gəlsə və qanunverici orqanda konstitusion çoxluğu əldə etsə, “Vahid Milli Hərəkat” partiyasını konstitusiyaya zidd partiya elan edəcək.
Xatırladaq ki, oktyabrın 26-da Gürcüstanda parlament seçkiləri keçiriləcək. Hakim “Gürcü Arzusu – Demokratik Gürcüstan” partiyasının liderlərinin fikrincə, partiyanın reytinqi 60%-ə yaxındır və bir çox müxalifət partiyaları parlamentə daxil olmaq üçün beş faizlik baryeri aşa bilməyəcək.
Bəzi kiçik müxalifət partiyaları artıq seçkilərdən əvvəl daha böyük partiyalarla birləşəcəklərini bəyan ediblər ki, bu da onlara parlamentə daxil olmağa imkan verə bilər.
Parlamentdə konstitusiya çoxluğunu əldə etmək üçün 150 mandatdan ən azı 113-nə malik olmaq lazımdır.
Tətbiqimizi yükləyə bilərsiniz
