Fövqəladə Hallar Nazirliyi (FHN) Bakının Xətai rayonu, N.Əliyev küçəsi 10 ünvanında elektrik yarımstansiyasının tikintisi ilə bağlı məsələyə aydınlıq gətirib.
Nazirlikdən APA-ya verilən məlumata görə, Xətai rayonu N.Əliyev küçəsi 10 ünvanında yerləşən “Baku Lux” MMC-yə məxsus yaşayış binasının ərazisində inşa olunan, sahəsi 64 kv/m elektrik yarımstansiyasının tikintisi üçün heç bir icra hakimiyyəti orqanı ilə razılaşdırma sənədləri təqdim olunmayıb: “Məsələ ilə bağlı 05 fevral 2020-ci il tarixində Xətai Rayon İcra Hakimiyyətinin rəhbərliyinə və “Baku Lux” MMC-nin rəhbərliyinə müvafiq məktublar göndərilib”.
Qeyd edək ki, mediada adıçəkilən ünvanda yaşayan sakinlərin elektrik yarımstansiyasının tikintisinə etiraz etməsinə dair məlumat yayılıb. Sakinlər yarımstansiyanın tikintisinin qanuni əsaslarla aparılmadığını iddia ediblər və bununla bağlı rəsmi orqanlara müraciət etdiklərini bildiriblər.
Xatırladaq ki, Bakıda bir qrup sakin yaşadıqları binanın qarşısında elektrik yarımstansiyasının tikintisinə etiraz edir.
Onlar bununla bağlı Baş Prokuror Zakir Qaralova, Dövlət Şəhərsalma və Arxitektura Komitəsinin sədri Anar Quliyevə, Fövqəladə Hallar naziri Kəmaləddin Heydərova və Bakı Şəhər İcra Hakimiyyətinin başçısı Eldar Əzizova müraciət ünvanlayıblar.
Bakı şəhər Xətai rayonu, Natiq Əliyev küçəsi 3 E ünvanında yaşayan şikayətçilər ərizələrində bildiriblər ki, yaşadıqları ərazidə kifayət qədər sərbəst sahələri olsa da, baş plana əməl etmədən Dövlət Şəhərsalma norma və qaydaların 9.13 bəndini kobud sürətdə pozaraq onların binalarının qabağında 5 metrlik məsafədə elektrik yarımstansiyası tikməyə başlanılıb: “Halbuki həmin qaydaların müvafiq bəndində göstərilir ki, ayrıca duran paylayıcı və hər birinin gücü 10 kubmetr kV.A-da qədər və sayı 2-dən çox olmayan transformatorlardan ibarət 6-20 kV gərginlikli transformator yarımstansiyaları yerləşdirilərkən, səsdən mühafizə tədbirləri yerinə yetirilməklə, onlardan yaşayış və ictimai binaların pəncərələrinə qədər məsafə 10 metrdən, müalicə-profilaktika müəssisələrinə qədər isə 15 metrdən az qəbul edilməməlidir”.
“Cinayət Məcəlləsinin 222.1-ci maddəsində göstərilib ki, tikintinin planlaşdırılması, ona rəhbərlik edilməsi, habelə tikinti obyektinin sökülməsi və ya bu obyektdə yenidənqurmanın aparılması zamanı işlərin, eləcə də mədən işlərinin və sair işlərin aparılmasının təhlükəsizliyi qaydalarının pozulması insanların həyat və sağlamlığı üçün real təhlükə yaratması cinayət əməlidir və həmin vəzifəli şəxslər cinayət məsuliyyətinə cəlb olunmalıdır”, - ərizədə bildirilir.
Sakinlər onların həyatı üçün təhlükənin yarandığını vurğulayıblar: “Dəfələrlə müraciət etməyimizə baxmayaraq, tikinti şirkətinin rəhbərliyi bizim müraciətlərimizə əhəmiyyət verməyib”.
Binanın sakinləri qanunsuz hərəkətlərin qarşısının alınması, əhalinin sağlamlığına təhlükə yaradan işlərin dayandırılması və təqsirkar şəxslərin məsuliyyətə cəlb edilməsini barədə aidiyyatı qurumların göstəriş vermələrini xahiş edirlər.
Tətbiqimizi yükləyə bilərsiniz
