Azərbaycanda gömrük-sərhəd buraxılış məntəqələrində insan bədəninin hərarəti yoxlanılır, Dövlət Gömrük Komitəsi bildirib.
Komitədən BBC News Azərbaycancaya deyilib ki, insanlar üçün qlobal təhlükə törədən yoluxucu xəstəliklər, xüsusilə, son günlər Çində naməlum etimologiyalı sətəlcəm xəstəliyinin aşkar edilməsi ilə əlaqədar gömrük-sərhəd buraxılış məntəqələrində gömrük orqanları tərəfindən müvafiq işlər aparılır.
Çində bütün ölkə boyu sürətlə yayılan yeni virusdan dörd nəfər ölüb. Çin hökuməti bu virusun insandan-insana ötürülə biləcəyini təsdiq edib. Pnevmoniyanın bir növünə gətirib çıxaran koronavirusun yeni ştammının sonuncu qurbanı 89 yaşlı kişi olub.
"Öskürək, halsızlıq, yüksək hərarət, yuxarı tənəffüs yollarının katarı və s. simtomplarla özünü büruzə verən fiziki şəxslərin müəyyənləşdirilməsi üçün məsafədən insan bədəninin hərarətinin ölçülməsində istifadə olunan cihazlar (termovizorlar) vasitəsi ilə termometriya, tibbi sorğu, vizual müayinə və digər diaqnostik üsullarla tibbi-sanitariya yoxlaması gücləndirilmiş rejimdə həyata keçirilir," - Azərbaycan Dövlət Gömrük Komitəsinin mətbuat xidməti BBC News Azərbaycancaya açıqlayıb.
Qurum bildirib ki, yoxlanış zamanı xəstə və xəstəliyə şübhəli şəxslər aşkar edilərsə, onların müvəqqəti təcrid olunması üçün ayrılan və zəruri əşyalarla təmin edilən yerlərdə müayinəsinə lazımi şərait yaradılıb.
"Hələ ki, Azərbaycanda koronavirus aşkar olunmayıb".
Respublika Gigiyena və Epidemiologiya Mərkəzininin Epidemiologiya şöbəsinin direktor müavini Afaq Əliyeva BBC News Azərbaycancaya deyib ki, "bu günə olan məlumata görə, Azərbaycanda koronavirus aşkar olunmayıb".
Onun sözlərinə görə, Azərbaycanda qripəbənzər və ağır gedişli respirator xəstələrdən laboratoriya materialları götürülərək Respublika Taun Əleyhinə Stansiyanın laboratoriyasında yoxlanılır.
"Azərbaycanda tək-təh hallarda mövsümi qrip virusu aşkar edilir, onlar da əsasən yüngül keçən respirator virus infeksiyalarıdır. Bu günə vəziyyət sabitdir və artım müşahidə olunmur".
Azərbaycan Ümumdünya Səhiyyə Təşkilatının koronavirus və digər xəstəliklərlə bağlı təcili addımların atılmalı olduğu ölkələr siyahısında yer almayıb.
Azərbaycan Hava Yollarından BBC News Azərbaycancaya bildirilib ki, Çindən Bakıya həftə ərzində 2 reys AZAL və 2 reys "China Southern" aviaşirkəti tərəfindən olmaqla, ümumilikdə, 4 reys yerinə yetirilir.
Bakıya Çinin Pekin və Urumçi şəhərlərindən aviareyslər var.
Çində 4 nəfər ölüb
Reuters bildirir ki, Ümumdünya Səhiyyə Təşkilatı dünyadakı xəstəxanalara infeksiyanın qarşısının alınması və nəzarət mövzusunda təlimatlar göndərib.
Qurum virusun yayılmasının beynəlxalq fövqəladə hal olub-olmadığını qiymətləndirmək üçün yanvarın 22-də mütəxəssislərin təcili komissiyasını çağırıb.
Çində bütün ölkə boyu sürətlə yayılan yeni virusdan dörd nəfər ölüb. Çin hökuməti bu virusun insandan-insana ötürülə biləcəyini təsdiq edib.
Pnevmoniyanın bir növünə gətirib çıxaran koronavirusun yeni ştammının sonuncu qurbanı 89 yaşlı kişi olub.
O, Çinin virusun yayılma mərkəzi olan Wuhan şəhərində yaşayırdı.
Çinin Pekin (Beijing) və Şanxay (Shanghai) daxil olmaqla əsas şəhərlərində 200-dən çox hal qeydə alınıb.
Çinin Milli Səhiyyə Komissiyası bazar ertəsi Çinin Guangdong əyalətindəki iki yoluxma halının insandan-insana keçdiyini təsdiqləyib.
Wuhan Bələdiyyə Səhiyyə Komissiyası şəhərdə azı 15 tibb işçisinin virusa yoluxduğunu, onlardan birinin vəziyyətinin ağır olduğunu açıqlayıb.
Onların hamısı müalicə müddətində təcrid vəziyyətində saxlanır.
Bu xəstəliyə ilk olaraq Çinin 11 milyonluq Wuhan şəhərində keçən il rast gəlinib.
Bu virusun yüz milyonlarla insanın keçən həftə Çin Yeni ilini qeyd etmək üçün ölkə daxilində səyahət etməsindən dolayı geniş yayıla biləcəyi barədə narahatlıqlar var.
Virusla bağlı bir neçə hal ölkə xaricində də qeydə alınıb: bunlardan biri Tailand, biri Yaponiya, digəri isə Cənubi Koreyada müəyyənləşib. Onlar bu yaxınlarda Çinin Wuhan şəhərinə səyahət etmiş insanlar olub.
Sinqapur, Honq Konq və Tokyo, ABŞ-ın San Francisco, Los Angeles və New York ştatlarının əsas hava limanları Çinin Wuhan şəhərindən gələn sərnişinləri yoxlanışdan keçirirlər.
Avstraliya hökuməti də Wuhan-dan Sydney-ə uçan sərnişinlərin yoxlanılacağını açıqlayıb.
Tətbiqimizi yükləyə bilərsiniz
