Oruc tutarkən bunlara diqqət edin:
- Sahur və iftarda birdən-birə çox yemək sağlamlığa ağır zərbədir;
- iftar və sahurda yüngül yeməklər yeyin;
- süfrədən doymadan qalxın;
- ürək xəstəliyi və təzyiqi olanlar duzlu, qızardılmış və xəmir xörəklərindən uzaq olun;
- mədəsindən şikayət edənlərin antiasid dərmanlardan istifadə etmələri məsləhətdir;
Oruc tutarkən başınız ağrıyırsa:
İftar və sahurda çoxlu su için. Günortadan sonra yaranan diqqətsizlik iş qabiliyyətinə mənfi təsir göstərdiyindən axşamlar çoxlu maye qəbul etmək, sahura mütləq qalxmaq və qida qəbulunu düzgün riayət etmək lazımdır.
Ramazanda çalışın yuxu rejiminiz pozulmasın. İşləyənlər çox vaxt elə iş yerindəcə iftarını açmağa məcbur olurlar. Sonra evə gələndə də təkrar iftar süfrəsinə otururlar. Bu isə həddən çox qida qəbuluna səbəb olur. İş yerində iftar açarkən 1 stəkan meyvə şirəsi, 1 boşqab şorba və azca da çörək kifayətdir. Bu qidalar həmin anda orqanizmin qlükoza və maye ehtiyacını ödəyir. Yalnız bundan sonra evə gələrkən axşam yeməyinə oturmaq olar.
Axşam yeməyi zamanı:
Ət və ya paxlalı yeməklərə, yəni tərkibində protein olan qidalara, plov, makaron, 1 stəkan ayran, yaxud bir az qatığa üstünlük verin. İşləyən insanlar hökmən sahura qalxmalıdırlar. Bu zaman 1 stəkan süd, 1 ədəd meyvə və lazımi miqdarda su içmək kifayətdir.
Oruc tutarkən diqqət dağınıqlığı baş verirsə:
Daha keyfiyyətli işə nail olmaq üçün səhər saatları seçilməlidir. Çünki günorta və günortadan sonra qanda şəkərin səviyyəsi ilə yanaşı, işgörmə qabiliyyəti də azalır. Orucluqda orqanizmdə halsızlıq, qan təzyiqinin aşağı düşməsi halları baş verir. Eyni zamanda tərləmə, enerjinin azalması, başgicəllənmələr də müşahidə olunur. Səbəbi isə orqanizmin iftar və sahurda su və duz ehtiyacının ödənilməməsidir.
Oruc tutma səbəbilə meydana çıxan baş ağrısını necə aradan qaldırmaq olar?
Ramazanın ilk günlərində kəskin baş ağrıları yaranır. Səhərlər qəhvə içənlərdə və siqaret çəkənlərdə belə hallara daha çox rast gəlinir. Bunun üçün Ramazana 1-2 həftə qalmış siqaret və qəhvəni azaltmaq, əvəzində iftardan sonra meyvə çayları içmək məsləhətdir.
Sahur yeməkləri
Sahur süfrəsində düzgün qidalar seçilməlidir. Yeməklə birlikdə gün ərzində orqanizmin ehtiyacını qarşılayacaq miqdarda su içmək lazımdır. Çay, meyvə şirəsi və ya kompot da içə bilərsiniz. İftar və sahur arası müddətdə çoxlu su içməli, şəkəri az olan şirniyyatlar və meyvələr yeyilməlidir.
Sahurda ağır, yağlı yeməklərdən çəkinin. Tərkibində zeytun yağı olan qidalar, plov, qatıq, makaron yemək, 1 fincan açıq çay içmək məqsədəuyğundur.
Hüseyn Məmmədov