hekimler-korpenin-gozunden-11-parazit-cixardilar-foto

Həkimlər körpənin gözündən 11 parazit çıxardılar - FOTO

turkiyedeki-ermeni-kilselerinin-sayi-ermenistandaki-kilselerinin-sayindan-coxdur-siyahi

Türkiyədəki erməni kilsələrinin sayı Ermənistanda kilsələrinin sayından çoxdur - SİYAHI

azerbaycanda-memurlar-sahibkarlardan-daha-cox-qazanirlar-resmi

Azərbaycanda məmurlar sahibkarlardan daha çox qazanırlar - RƏSMİ

bazar, 21 oktyabr 2018
RU EN TR
EN TR RU

PƏNCƏRƏ

Xoş gəldin, Aylar sultanı!

Xoş gəldin, dərdlər dərmanı!

29.05.2017 18:40

Ramazan 11 ayın sultanıdır, qiyamətə qədər Adəm oğluna haqq yolu göstərəcək Qurani-Kərimin bəşərin könlünə endirilməyə başlandığı aydır, Peyğəmbərimizə (s.ə.s.) peyğəmbərlik verildiyi aydır, içində min aydan daha xeyirli olan Qədr gecəsinin olduğu aydır, dua ayıdır, Allah-Təalaya (c.c.) yaxınlaşmaq, yəni mənəvi yüksəliş yolunda məsafə qət edə bilmək üçün misilsiz fürsət mövsümüdür. Ən başlıcası isə Allah-Təalanın "mənim ayımdır", - buyurduğu aydır. Bu ayda Allah-Taalanın xeyir-bərəkəti sel kimi çağlayar, sevən könüllər fərqli bir atmosferdə sonsuz aləmlərə qanad açar, şeytanlar zəncirə vurular, cənnət qapıları taybatay açılar, möminin duası ilə uca Rəbbimiz arasındakı bütün pardələr aradan qaldırılar, günahlar bağışlanar, könüllər bu ayın bərəkəti ilə yumşalar, öz mahiyyətini, gərəyini, vəzifəsini anlayar, bilmədiyimiz gözəlliklər, xeyir qapıları açılar üzümüzə.

Allah-Təala bu ayın feyz-bərəkətindən ehtiyacımız qədər yararlana bilməyi bizlərə nəsib buyursun!

***

Elə söhbətimizin əvvəlində deyək ki, Ramazan ayında oruc tutmaq Allah-Taalanın əmridir. Yəni bu ibadəti yerinə yetirmək Allah-Taalanın əmrini yerinə yetirməkdir, əksi, yəni üzrlü bir səbəb olmadığı halda orucu tərk eləmək isə günahdır, Allah-Taalanın əmrindən imtina etməkdir. Ramazanda orucun əmr olunduğu bəzi ayələrə diqqət yetirək:

- (Oruc tutmaq) sayı müəyyən olan günlərdir. (Bu günlərdə) sizdən xəstə və ya səfərdə olanlar tutmadığı günlər qədər başqa günlərdə oruc tutmalıdırlar. Oruc tutmağa taqəti olmayanlar isə (hər günün əvəzində) bir yoxsulu doyuracaq qədər fidyə verməlidirlər. Hər kəs könüllü xeyir iş görərsə (həm oruc tutub, həm də fidyə verərsə), bu onun üçün daha yaxşı olar. Bilsəniz oruc tutmaq sizin üçün nə qədər xeyirlidir! (Bəqərə, 2/184)

- İnsanlara doğru yolu göstərən, bu yolu açıq dəlillləri ilə aydınladan və (haqqı batildən) ayıran (Quran) Ramazan ayında nazil edilmişdir. Aya (Ramazan ayına) yetişən şəxslər (bu ayı) oruc tutmalıdırlar; xəstə və ya səfərdə olanlar isə tutmadığı günlərin sayı qədər başqa günlərdə tutsunlar. Allah sizin üçün ağırlıq deyil, asanlıq istər ki, fövtə gedən günlərin orucunu tamamlayasınız və sizi düz yola yönəltməsinə görə Ona ("Allahu Əkbər" deməklə) təzim və şükür edəsiniz. (Bəqərə, 2/185)

- Oruc gecəsi qadınlarınıza yaxınlaşmaq sizə halal edildi. Onlar sizin, siz də onların libasısınız (bir-birinizə həddindən artıq yaxınsınız). Allah sizin özünüzə pislik (xəyanət) etdiyinizi (yaxud nəfsinizə qarşı zəiflik göstərəcəyinizi) bilib tövbələrinizi qəbul edərək sizi bağışladı; artıq siz onlara yaxınlaşın, Allahın sizə halal buyurduğunu onlardan istəyin; sübh açılınca, ağ sap qara sapdan fərqlənincəyə qədər yeyib-için; sonra gecəyə qədər orucunuzu tamamlayın; məscidlərdə ibadətdə (etikafda) olduğunuz zaman onlarla (qadınlarınızla) yaxınlıq etməyin. Bunlar (bu hökmlər) Allahın hədləridir, bunları aşmayın! Allah (insanlara) bu cür bildirir ki, bəlkə, müttəqi olsunlar!.. (Bəqərə, 2/187)

***

Oruc tutan adam imsaqdan (orucun başlanma anından) iftara (orucun bitdiyi ana) qədər heç bir şey yeməz, içməz, cinsi münasibətdən uzaq olar. Siqaret çəkmək və ya yanında siqaret çəkən varsa, bilərəkdən onun buraxdığı tüstünü udmaq, zövqverici duman və ya tüstüləri udmaq da orucu pozar. Oruclu ikən duş qəbul etmək olar, amma İmam cəfərin ictihadına görə, başı suya soxsan, oruc pozular. Ona görə də bu gözəl ayda tədbirli davranmaq, bütün təhlükəli məqamlardan uzaq olmaq lazımdır.

Oruca belə niyyət edilir: "Niyyət edirəm Allah rizası üçün sabahkı ramazan orucunu tutmağa." Sübh zamanı imsaq (el arasında buna o başdan da deyilir) yeməyinə durub yeyib-içmək də niyyət yerinə keçər. İftar zamanı isə belə dua edilməsi gözəldir: "Allahım, Sənin rizan üçün oruc tutdum, Sənə inandım, Sənə güvəndim, Sənin verdiyin ruzi ilə orucumu açıram və sabahkı ramazan orucuna niyyət edirəm. Mənim bilərəkdən və ya bilməyərək keçmişdə işləmiş olduğum və gələcəkdə işləyəcəyim bütün günahlarımı bağışla!"

Unutmayaq ki, oruc tutana hörmət orucun Sahibinə, yəni Allah-Taalaya hörmətdir. Sevimli Peyğəmbərimiz (Ona Allah-Taalanın salamı olsun!) buyurur ki, oruc tutanı iftar yeməyinə qonaq eləyən elə oruc tutan qədər savab qazanar. Ona görə də bu ayda ətrafımızda oruc tutan qardaş-bacılarımızın olduğunu düşünərək daha həssas davranmalıyıq. İctimai yerlərdə siqaret çəkmək, açıq havada iyli yeməklər (məsələn kabab) bişirib iyini ətrafa yaymaq ən yumşaq şəkildə desək, oruca hörmətsizlikdir. Özün tutarsan-tutmazsan, bunun hesabını Allah-Taalaya verəcəksən, amma oruc tutanlara əziyyət vermək insan haqqını tapdalamaq, onun günahını almaqdır. Oruc tutmasan belə camaatın gözü qarşısında yeyib-içmək ədəbə uyğun deyil. Bəziləri deyirlər ki, 17-18 saat ac-susuz qalmaq olmaz. Bu düşüncə yanlışdır, Allah-Taalaya bir növ böhtan atmaq kimidir. Çünki insan Allah-Taalanın əsəridir və günlərlə aclığa asanlıqla davam gətirər. Onu da xüsusi vurğulayaq ki, oruc tutmaq səhhəti yerində olan insanı daha da sağlamlaşdırar, onu bilmədiyi bir çox xəstəliklərdən, bəlalardan qoruyar. Sevimli Peyğəmbərimiz buyurur ki, oruc tutun ki, sağlam olasınız.

Oxundu 1484