Noyabrın 28-də vəzifəsindən uzaqlaşdırılan Ukrayna prezident aparatının keçmiş rəhbəri Andrey Yermak bildirib ki, işdən çıxarılmasına görə ölkə başçısı Volodimir Zelenskiyə qarşı heç bir incikliyi yoxdur.
Yeniavaz.com xəbər verir ki, Yermak bu barədə “Financial Times”a müsahibəsində bildirib.
“O, bu işdən əvvəl də mənim dostum idi, bundan sonra da belə qalacaq”, - Yermak deyib.
Eyni zamanda o, Donald Trampın iştirak etdiyi sülh planı üzrə danışıqların nəticələrini xatırladıb:
“Mənim Cenevrədə rəhbərlik etdiyim nümayəndə heyəti amerikalı tərəfdaşlarımızla birlikdə 28 bəndlik sənədin artıq mövcud olmamasını təmin etdi. Yenidən hazırlanmış sülh planı indi Kiyev üçün daha məqbul olan 19 bəndə sahibidir. Razılaşdırılmalı olan bir neçə çətin məqam qalır və mən bunun mümkün olduğuna inanıram. Hər halda prezident təzyiqlərə baxmayaraq, Ukraynanın maraqlarına zidd olan heç nəyi imzalamayacaq və təsdiqləməyəcək”.
Xatırladaq ki, Ukrayna Prezidenti Volodimir Zelenski noyabrın 28-də öz administrasiyasının rəhbəri Andrey Yermakın vəzifəsindən azad edilməsi haqqında fərman imzalayıb. Həmin gün səhər saatlarında Ukraynadakı bütün atom elektrik stansiyalarını idarə edən Enerqoatom şirkətində irimiqyaslı mənimsəmə ilə bağlı araşdırma çərçivəsində antikorrupsiya rəsmiləri məmurun evində axtarış aparıblar. Müstəntiqlər Yermaka rəsmi ittiham irəli sürməyiblər. O, istefa ərizəsini verdikdən sonra cəbhəyə getmək niyyətini açıqlayıb. Ukrayna Milli Təhlükəsizlik və Müdafiə Şurasının katibi Rustem Umerov Yermakın yerinə Ukrayna danışıqlar qrupunun yeni rəhbəri təyin edilib.
Tətbiqimizi yükləyə bilərsiniz
