Qəzzada atəşkəslə bağlı “Sülh sammiti” keçiriləcək

Oktyabrın 13-də Misirin Şarm əl-Şeyx şəhərində Qəzzada atəşkəs sazişinin imzalanması ilə bağlı “Sülh sammiti” keçiriləcək.
Yeniavaz.com xəbər verir ki, bu barədə Misir Prezidenti Əbdülfəttah əs-Sisinin ofisi “Facebook” sosial şəbəkə hesabında məlumat yayıb.
“Sülh Sammiti oktyabrın 13-də Şarm əl-Şeyxdə keçiriləcək və ona Misir və ABŞ prezidentləri sədrlik edəcək", - məlumatda bildirilib.
Misir Prezidentinin ofisi həmçinin sammitə 20 ölkənin lideri dəvət olunduğunu qeyd edib.
İştirakçıların dəqiq siyahısı hələ açıqlanmayıb.
Qeyd edək ki, Azərbaycan da Qəzza zolağında atəşkəs sazişinin imzalanması münasibətilə Misirin Şarm əl-Şeyx şəhərində baş tutacaq "Sülh Sammiti"nə dəvət olunub.
Xatırladaq ki, oktyabrın 9-da ABŞ Prezidenti Donald Tramp İsrail və Fələstinin HƏMAS hərəkatı arasında Qəzza zolağı ilə bağlı sülh planının birinci mərhələsinə dair saziş imzalandığını açıqlayıb. Amerika lideri izah edib ki, bu, bütün girovların “ən qısa bir vaxtda” azad edilməsi, eləcə də İsrail qoşunlarının razılaşdırılmış xəttə çıxarılması deməkdir.
Həmçinin, oktyabrın 10-da İsrail hökuməti Qəzza zolağında saxlanılan bütün girovların azad edilməsi planını təsdiqləyib. Palana əsasən bütün girovların (sağ qalmayan girovlar da daxil olmaqla) azad edilməsi nəzərdə tutulur.