“Misir, Qətər və Türkiyəni təmsil edən vasitəçilər, eləcə də ABŞ administrasiyası Fələstinin HƏMAS hərəkatına Qəzza zolağında hərbi münaqişənin yenidən başlamayacağına dair zəmanət verib”.
Yeniavaz.com xəbər verir ki, bu barədə anklavda HƏMAS hərəkatının rəhbəri və danışıqların nümayəndə heyətinin rəhbəri Xəlil əl-Heya məlumat verib.
“Biz vasitəçi ölkələrdən və ABŞ administrasiyasından Qəzzada müharibənin nəhayət başa çatdığına dair zəmanət almışıq”, - HƏMAS-ın siyasi büro üzvü vurğulayıb.
Əl-Heya qeyd edib ki, Misirin Şarm əl-Şeyx şəhərində əldə olunan atəşkəs razılaşması İsrail qoşunlarının çıxarılmasını və humanitar yardımın idxalını da nəzərdə tutur. Bununla bağlı o, Misirlə Fələstin anklavı arasındakı sərhəddə yerləşən Rəfah keçidinin “hər iki istiqamətdə yenidən açılacağını” bildirib. HƏMAS danışıqlar nümayəndə heyətinin rəhbəri, İsrailin Fələstinli məhbuslarla girov mübadiləsinin bir hissəsi olaraq, müqavilədə də nəzərdə tutulan ömürlük həbs cəzası çəkən 250 fələstinlinin İsrail həbsxanalarından azad ediləcəyini açıqlayıb. O, əlavə edib ki, “2023-cü il oktyabrın 7-dən sonra saxlanılan 1700 fələstinli, hazırda həbsdə olan bütün fələstinli azyaşlılar və bütün məhkum olunmuş qadın məhbuslar” da azad ediləcək.
Tətbiqimizi yükləyə bilərsiniz
