Qətərin vasitəçi kimi çıxış etdiyi Qəzza zolağında münaqişənin həlli üzrə danışıqlar İsrailin Dohaya endirdiyi zərbələrdən sonra dayandırılıb.
Yeniavaz.com xəbər verir ki, bu barədə Qətərin baş naziri və xarici işlər naziri Şeyx Məhəmməd bin Əbdül Rəhman Əl Tani Dohada keçirdiyi mətbuat konfransında bildirib.
“Biz Qəzza üzrə uğurlu danışıqlar prosesini təmin etmək üçün hər cür səy göstərdik. Qəzzaya qarşı təcavüzü dayandırmaq üçün mümkün olan hər şeyi etdik. Hazırkı danışıqlara gəldikdə isə, inanmıram ki, bu gördüklərimizdən sonra onlar davam edə bilər”, - baş nazir qeyd edib.
Onun sözlərinə görə, bu hücum təkcə beynəlxalq hüququn deyil, həm də etik normaların pozulmasıdır.
“Son günlər danışıqlar Amerika tərəfinin xahişi ilə ondan alınan yekun sənədin müzakirəsi üçün irəliləyir və davam edir. Buna baxmayaraq, mütəmadi olaraq Dohaya nümayəndə heyətləri göndərən İsrail Qəzzadakı münaqişənin həlli üçün bütün cəhdləri sabotaj etməyə çalışır”, - baş nazir əlavə edib.
Tətbiqimizi yükləyə bilərsiniz
