Nobel mükafatları bu tarixlərdə elan ediləcək

2025-ci il Nobel mükafatı laureatlarının adları oktyabrın 6-13-də Stokholm və Osloda elan olunacaq.
Yeniavaz.com xəbər verir ki, bu barədə Nobel Fondu rəsmi saytında məlumat yayıb.
Məlumata görə, fiziologiya və tibb sahəsində laureatların adları oktyabrın 6-da Karolinska İnstitutu nəzdindəki Nobel Komitəsində elan ediləcək.
Fizika üzrə mükafatın qalibi oktyabrın 7-də, kimya üzrə mükafatın qalibi oktyabrın 8-də Kral Elmlər Akademiyası nəzdindəki Nobel Komitəsində açıqlanacaq.
Oktyabrın 9-da İsveç Akademiyası ədəbiyyat sahəsindəki seçimini elan edəcək.
Nobel Sülh Mükafatının qalibi isə oktyabrın 10-da Norveç Nobel Komitəsi tərəfindən Osloda elan olunacaq.
Oktyabrın 13-də Stokholmda Kral Elmlər Akademiyasında İqtisadiyyat üzrə Nobel Komitəsi tərəfindən Alfred Nobelin xatirəsinə İsveç Dövlət Bankının mükafatının qalibi açıqlanacaq.
Bütün mükafat elanları Nobel mükafatının rəsmi rəqəmsal kanallarında canlı yayımlanacaq.