Ukrayna Prezidenti Volodimir Zelenski “Ukrayna xalqının milli yaddaşının dövlət siyasətinin əsasları haqqında” qanunu imzalayıb.
Yeniavaz.com xəbər verir ki, bu barədə Prezident Aparatının rəhbərinin müavini İrina Vereşçuk məlumat yayıb.
Bildirilib ki, bu, ölkənin əvvəlki prezidentlərinin imzalamaq istəmədiyi, bacarmadığı və ya cəsarət etmədiyi Ukraynanın milli kimliyinin qorunması və inkişafı ilə bağlı fundamental qanundur.
Ali Rada avqustun 21-də qanunu təsdiqləyib.
Ukraynanın “Ədliyyə və Hüquq qəzeti”nin məlumatına görə, bu sənəd ilk dəfə olaraq dövlət səviyyəsində “Ukraynanın müstəqilliyi uğrunda müharibə”, “tarixi anti-Ukrayna təbliğatı”, “Ukrayna xalqına qarşı cinayətlər” kimi anlayışları müəyyənləşdirir. Qanunda həmçinin “raşizm” termini “təcavüzkar dövlətdə formalaşmış rus nasist totalitar rejiminin əsasında duran və rus şovinizmi və imperializminin ənənələrinə, kommunist və milli sosialist (nasist) totalitar rejimlərinin təcrübələrinə əsaslanan totalitar ideologiya və praktika növü” kimi də müəyyən edilir.
Qeyd edək ki, “raşizm” termini 2008-ci ildən gec olmayaraq, Rusiya ilə Gürcüstan arasında müharibə zamanı yaranıb.
Tətbiqimizi yükləyə bilərsiniz
