İsrail 20 girov müqabilində atəşkəsə hazırdır – KİV

İsrail atəşkəs sazişinin birinci mərhələsində cəmi 20 girovun azad edilməsinə razılaşmağa hazırdır, bir şərtlə ki, onları qadınlar, 50 yaşdan yuxarı kişilər və ya ağır xəstələr təşkil etsin.
Yeniavaz.com xəbər verir ki, bu barədə “The Times of Israel” məlumat yayıb.
Qeyd olunur ki, son təklifdə bu kateqoriyalardan olan 40 girovun azad edilməsi nəzərdə tutulurdu, lakin HƏMAS bildirib ki, bu meyarlara cavab verən o qədər canlı girov yoxdur.
Hazırkı çıxılmaz vəziyyətə görə, aprelin 25-də İsrailin hərbi kabineti danışıqlar qrupuna əlavə danışıqlar üçün cümə günü Təl-Əvivə gələcək Misir nümayəndə heyəti ilə daha çevik müzakirə səlahiyyəti verib.
Qeyd edək ki, aprelin əvvəlində danışıqlarda iştirak edən tərəflər münaqişə tərəflərinə Qəzza zolağında üç mərhələdə həyata keçirilməli olan atəşkəslə bağlı yeni təklif təqdim ediblər. Birinci mərhələdə HƏMAS Qəzza zolağında saxlanılan 40 israilli girovu azad edəcək, müqabilində 100-ü ömürlük həbs cəzasına məhkum edilmiş 900 fələstinli məhbus qaytarılacaq. Mümkün atəşkəs üçün digər parametrlər Qəzzanın şimal hissəsinə məcburi köçkün mülki şəxslərin qayıtması və humanitar yardım daşıyan 500 yük maşınının gündəlik keçidi olub.