Daha 2 nəfər “Abzas Media işi” üzrə dindirilməyə çağırıldı

İnarə Hünbətova və Şəms Hacıyeva “Abzas Media iş” üzrə dindirilməyə çağırılıb.
Yeniavaz.com xəbər verir ki, bu barədə “Abzas Media” məlumat yayıb.
Bildirilir ki, aprelin 15-dən etibarən Bakı Şəhər Baş Polis İdarəsinin (BŞBPİ) müstəntiqləri onlarla əlaqə saxlayıb, İnarə Hünbətovanı aprelin 16-sı, Şəms Hacıyevanı isə 17-si günorta saatlarına idarəyə dəvət ediblər.
Mətbuat orqanı yazır ki, hər iki gəncin “Abzas Media” ilə əlaqəsi yoxdur və onlara niyə bu iş üzrə şahid qismində cəlb edilmələri bildirilməyib.
Qeyd edək ki, daha əvvəl jurnalist İsmayıl Tağıyev də “Abzas Media işi” üzrə dindirilməyə çağırılıb.
Xatırladaq ki, ötən il noyabrın 20-də “Abzas Media”nın direktoru Ülvi Həsənli, onun müavini Məhəmməd Kekalov, noyabrın 21-də saytın baş redaktoru Sevinc Vaqifqızı, noyabrın 30-da reportyor Nərgiz Absalamova, dekabrın 13-də araşdırmaçı jurnalist Hafiz Babalı, yanvarın 13-də isə jurnalist Elnarə Qasımova saxlanılıb.
Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb, barələrində həbs qətimkan tədbiri seçilib.
Jurnalistlər ittihamları rədd edir, həbslərini “Abzas Media”da dərc olunan korrupsiya araşdırmaları ilə əlaqələndirirlər.
Fevralın 24-dən başlayaraq “Abzas Media işi” üzrə həbs edilən bütün jurnalistlərin həbs müddətləri daha 3 ay artırılıb.