Azərbaycanda işsiz insanların olmadığı yeganə rayon hansıdır? - SİYAHI

Azərbaycanda məşğulluq xidməti orqanlarında işsiz statusu alan şəxslərin sayı 28 min 877 nəfər olub. "Yeniavaz.com" xəbər verir ki, bu barədə məlumat Dövlət Statistika Komitəsinin açıqladığı sonuncu statistik göstəricidə yer alıb. Açıqlanan statistik məlumatlardan belə görünür ki, işsiz statusu alan insanların sayı ən çox Mingəçevir şəhərində qeydə alınıb. Mingəçevirdə 1621 nəfər işsiz statusu alıb. İşsiz statusu alan şəxslərin sayına görə, Bərdə rayonu ikinci, Sumqayıt şəhəri isə üçüncü sırada qərarlaşıb. Bərdədə 1533, Sumqayıtda isə 1013 nəfər işsiz statusu alıb. İşsiz statusu alanların ən az olduğu rayon isə Daşkəsən rayonu hesab olunur. Bu rayonda cəmi 4 nəfər işsiz statuslu insan yaşayır. İşsiz statusu alan insanların az olduğu rayonların sıralamasında növbəti yerlərdə 20 nəfərlə Naftalan şəhəri və Ağdaş rayonu gəlir. Saatlı rayonunda isə 27 nəfər işsiz statusu olan şəxs yaşayır.

Komitənin açıqladığı məlumatdan belə görünür ki, işsiz statuslu insanlar Naxçıvan iqtisadi rayonu istisna olmaqla digər bütün rayonlarda yaşayırlar. Yalnız Naxçıvanda işsiz statuslu insan yoxdur. İşsiz statuslu insanlarla bağlı sonuncu məlumat 2011-ci ilə aiddir. Məlumata görə, 2009-cu ildə Naxçıvanda 7 min 904 nəfər işsiz statusuna sahib olub. 2010-cu ildə onların sayı 52-yə, 2011-ci ildə isə 32 nəfərə qədər azalıb. Sonrakı illərdə isə bu bölgədə işsiz statusu alan şəxs olmayıb.